Peningastyrkir til frambjóðenda eru góðir

Að sjálfsögðu á ekki að setja nein takmörk á hvað fyrirtæki eða einstaklingar mega styrkja frambjóðendur mikið.  Á sama hátt eiga frambjóðendur að ráða hvað þeir taka við háum styrkjum og frá hverjum.

Það er miklu verra að setja einhver sýndarhámörk á svona framlög. Slíkt leiðir til þess að menn finna upp á einhverjum krókaleiðum til að styðja við framboðin sín.  Auglýsingastofurnar, birtingafyrirtækin og fjölmiðlarnir verða látin senda reikningana eitthvað annað. Gerviafslættir verða búnir til. Leigupennar verða gerðir út á kostnað stuðningsmanna.

Miklu betra að hafa þetta sem mest uppi á borðinu.  Ef einhver frambjóðandi fer offari í auglýsingamennsku og skrumi þá fer það ekki framhjá neinum og kjósendur geta sniðgengið hann.

Sumir frambjóðendur hafa aðgang að ókeypis leiðum til að koma sér á framfæri.  Fjölmiðlafólk og þeir sem eru þekktir í þjóðfélaginu nota tengsl og vináttu til að auglýsa sig. Manni hefur oft ofboðið hvað fólk með slíkan bakgrunn getur fengið mikið pláss í fjölmiðlum.

Einnig geta auðmenn fjármagnað sína prófkjörsbaráttu sjálfir.

En svo á að banna eða torvelda litla óþekkta manninum að safna fé hjá þeim sem hafa trú á honum til að koma sér á framfæri.

Hámark eða bann á peningastyrkjum til frambjóðenda mun þess vegna snúast gegn markmiðum sínum.

Stundum eru hlutirnir ekki hugsaðir til enda.

Guðlaugur hyggst ekki víkja

Athugasemdir

[Björn Þorsteinsson (IP-tala skráð) 3.5.2010 kl. 20:18]

Líka bara að hafa það sem skildu að láta frambjóðendur segja hverjum það fær styrki frá og hve mikið, þá myndi maður allavega vita hver er á bakvið hvern og hversu mikið.

[Ólafur Ingi Hrólfsson, 4.5.2010 kl. 05:16]

Oftar en ekki eru frambjóðendur með fólk sem fer í fjársöfnun - þar sem ég þekki til hafa þeir ekki verið í þeim málum sjálfir enda eðlilegast að hafa það þannig.

Sú umræða sem er í gangi um Guðlaug - Steinunni og Helga er á því plani að neðar verður vart komist -

Siðblind - mútuþegar - glæpalýður +++++

Einhvernveginn virðist mér að umræðan eða upphaf hennar  komi yfirleitt frá andstæðingum þeirra innan eigin flokka -  svo tekur haugahugsun dómaranna á bloggsíðunum við sem kveða upp úrskurði um afsagnir ofl. og ráðast gegn heimilum fólks - mökum og börnum.

Það er leitt að okkar litla þjóðfélag skuli láta ofbeldið ráða - en kanski er það eðliegt framhald þess að fyrrverandi ríkisstjórn var komið frá með ofbeldi og núverandi stjórn reist á þeim sama ofbeldisgrunni.