Nú er mælirinn fullur

Fyrst datt mér í hug sú skýring að mælirinn hafi verið stilltur á Fahrenheit en ekki Celsius. Formúlan til að breyta á milli er C = (F - 32) * 5 / 9 sem þýðir að Celsius hitinn er 20 þegar Fahrenheit er 68. Það hefði amk. verið nær lagi en líklega ekki rétt því hitinn í Reykjavík varð ekki svo hár í gær þarna fyrir sunnan. 

Ég hefði hins vegar talað um "lyginn mælir" en ekki "lygamælir" í fréttinni. Eins og menn vita þá er lygamælir tæki sem notað er til þess að skynja hvort sagt sé satt eða ekki. Ég veit ekki til þess að lygamælar hafi verið settir á hitamæla en eftir þetta atvik finnst mér að það ætti að setja í lög að allstaðar þar sem eru hitamælar á opinberum stöðum eins og við Kringluna, þá ættu að vera við hliðina á þeim lygamælar sem sýna grænt ef hitamælirinn er réttur en rautt ef hitamælirinn er að ljúga.

Einnig væri gott að setja lygamæla á veðurfréttamennina í sjónvarpinu þannig að áhorfendur geti séð hvort þeir séu að spá réttu veðri á morgun, eða hvort þeir séu hreinlega að ljúga eins og maður hefur stundum lent í.

Fólk ætti að gjalda varhug við veðurmælingum. Nú er ég alveg hættur að treysta hitamælum enda hef ég oft tekið eftir skrítnum hitatölum og veðurlýsingum sem passa alls ekki við það sem maður upplifir. Fyrir nokkrum árum vorum við á Egilsstöðum í roki og rigningu og hlustuðum á það í útvarpinu að besta veðrið væri á austurlandi, sól og blíða !!!

Það er líka alkunna að fólk hefur sterka tilhneigingu til þess að ýkja gæði veðurfars í sínum heimabyggðum.

Lygamælir slær met

Athugasemdir

[Örn Jónasson (IP-tala skráð) 13.7.2007 kl. 10:46]

Ha, ha - þetta er með eindæmum.  En skýringin er einföld með þennan hitamæli, hann hefur verið stilltur á Fahrenheit mælieiningu.  68° Fahrenheit eru 20° C Celsius. 

Það er til einföld formúla til að breyta Fahrenheit í Celsius og hún er svona:

F° - 32 x 5/9 = C°  þannig að;

 68 - 32 x 5/9 = 20

Njótið sumarblíðunnar!

[Þorsteinn Sverrisson, 13.7.2007 kl. 14:22]

Takk fyrir Örn.  Þú skrifaðir nákvæmlega sömu formúluna og ég til að breyta yfir í Celsius og fékkst sömu niðurstöðu.  Mér finnst þetta frábært.  En þú ert ekki með skýringu á því hvers vegna mælir mældi sem svarar 20 gráður Celsíus þegar hitinn var bara 15 !!!