Nú er stundin runnin... - steinisv.blog.is

6.2.2008 | 18:27

Nú er stundin runnin upp...

...sem ég hef lengi óttast, eða amk. vitað að ætti eftir að bresta á. Ég er hættur að geta kennt syni mínum stærðfræði. Hann er á þriðja ári í menntaskóla og byrjaður að læra diffrun og tegrun. Ég hef yfirleitt getað hjálpað honum hingað til, með algebru, hornaföll, rúmfræði, logaryþma o.þ.h. En nú stend ég frammi fyrir því að ég er búinn að steingleyma þessum fræðum.

Samt lærði þetta allt á sínum tíma og gekk ágætlega, fyrst í menntaskóla hjá þeim merka fræðimanni Guðmundi Ólafssyni og síðan í Háskólanum. Kunni allar þessar reglur fram og til baka, Subsition, L'Hopital o.s.frv. Tók próf með ágætum. En ég hef ekkert notað þetta síðan.

Eins og þegar ég var í skóla þá finnst mér vanta fleiri sýnidæmi í kennslubókinni sem Bjössi er með, 600 blaðsíðna Calculus doðrantur. Man að ég keypti mér aðra bók fulla af leystum dæmum á sínum tíma en líklega hefur hún farið á haugana. Ég veit ekki af hverju höfundar stærðfræðibóka eru ekki með fleiri leyst dæmi, líklega vegna þess að þá óttast þeir að nemendur læri fræðin ekki nógu vel, heldur læri bara að leysa allar tegundir dæma eins og páfagaukar.

Ég fór að leita að safni með tegrunardæmum á netinu en fann engin góð. Það gerir leitina erfiða að það er ekki hægt að leita eftir tegrunartákninu. Vita blogglesara um einhverjar síður af þessu tagi?

Flokkur: Bloggar | Breytt s.d. kl. 21:15 | Facebook

Athugasemdir

Því miður. Ég veit ekki af neinni svona síðu og það er ekki nokkur möguleiki á að ég geti reiknað svona dæmi. En ég giska samt á að svarið sé 11.

Anna Einarsdóttir, 6.2.2008 kl. 19:28

tja.. ég keypti mér nú bara reiknivél sem reiknar svona dæmi fyrir mig thihihih :)

þá getur maður reiknað sig að svarinu :)

Sigrún Þöll, 6.2.2008 kl. 20:22

haha, já Anna, líklega er svarið 11 +/- eitthvað smotterí sem skiptir ekki máli. Svör við svona tegrunardæmum enda reyndar alltaf á +C ef ég man rétt þar sem C er einhver konstant...

Það er bannað að nota reiknivélar Sigrún