Undirbúningur fyrir Glitnis "maraþon"

Jæja þá er ég búinn að hlaupa 8 km. hérna í Elliðaárdalnum. Ég var bara að tékka á því hvort ég væri í stakk búinn til þess að hlaupa 10 km. í maraþoninu á laugardaginn. Ég held að ég hafi það alveg af eins og í fyrra þegar ég hljóp á 57 mínútum.  Ég er ekki langhlaupari að upplagi og var alltaf betri í spretthlaupi á mínum yngri árum.  Undanfarin ár hef ég reynt að hlaupa 5 km. nokkrum sinnum í viku og mér finnst það henta mér ágætlega.  Það er þannig með hreyfingu að ef maður fer yfir ákveðin mörk þá hættir hún að vera uppbyggjandi en verður í staðin slítandi.  Ég stefni á að hlaupa 5-8 km. morgun og hinn en taka svo pásu fram á laugardag.

Lífið er að komast í fastari skorður eftir sumarfrí. Frá því í júlíbyrjun höfum við að mestu haldið til í Costa del Úthlíð þar sem verið hefur slík einmuna verðursæld að elstu menn muna ekki annað eins (reyndar muna sumir orðið ansi fátt!). Húsið okkar í Melbænum er ennþá í rúst þar sem verið er að skipta um eldhúsinnréttingu og fleira. Við eldum núna við útlegubúnað en sem betur fer gátum við tengt vaskinn.  Kom sér vel að Ágúst Flóki sonur minn er að læra pípulagnir. Við erum búin að bíða eftir rafvirkja, pípara, flísara, smið, steinsmiðum, innréttingaversluninni, aftur rafvirkja, aftur flísara, aftur steinsmiðum o.s.frv o.s.frv.

Vonandi fara hlutabréfamarkaðirnir ekki til fjandans en það er búinn að vera mikill titringur á þeim undanfarið. Seðlabankar í Japan og Evrópu eru farnir að dæla út peningum til að laga ástandið.  Ég ætla að fylgjast vel með fréttum og ekki missa af því þegar Davíð Oddsson seðlabankastjóri fer niður í Austurstræti með fullt bretti af 5000 köllum og byrjar að dreifa þeim til fólks til að örva íslenska hagkerfið.

Athugasemdir

[Gíslína Erlendsdóttir, 14.8.2007 kl. 14:58]

Asskoti er þetta fín mynd af þér Steini. Sjáumst kannski á laugardaginn, kannski labba ég 3 og Palli 10, kemur í ljós. Ef þú ert í vandræðum þá er ég gift besta rafvirkjanum í bænum og kunningsskapur hefur nú oft reddað ýmsu. Gangi þér vel og megir þú brjóta öll persónuleg met á laugardaginn. Láttu mig vita ef þú fréttir af Dabba, langar líka að sjá.

[Þorsteinn Sverrisson, 14.8.2007 kl. 18:45]

Takk Gillí mín. Ég man að einu sinni bjargaði Palli okkur. Það væri gaman að sjá ykkur á laugardaginn en það verður væntanlega ógurleg mannmergð þarna eins og í fyrra.

Ath. það er hægt að heita á mig með því að smella á þessa slóð.
http://www.marathon.is/pages/aheit/?prm_participant_id=16824&prm_action=2

Áheitin ganga til SEM samtakanna (Samtök Endurhæfðra Mænuskaddaðra), sjá: www.sem.is