Gjábakkavegurinn er afar slæmur núna

Í gær fór ég Gjábakkaveg eins og oft áður í sumar. Rétttrúnaðarmenn í landafræði benda gjarnan á að vegurinn milli Þingvalla og Laugavatns sé ekki yfir Lyngdalsheiði enda sé hún talsvert sunnar.

En hvað um það.  Vegurinn er afar slæmur og man ég varla eftir öðru eins. Ungt þýskt par á litlum fólksbíl stoppaði okkur og spurði hvað væri langt eftir á Laugarvatn.  Þau héldu að þau hefðu villst af aðalveginum inn á einhvern slóða!!  Ég hitti fleiri erlenda ferðamenn um helgina sem töluðu um hvað vegurinn hefði verið slæmur.  Að mínu mati ætti að setja skilti við veginn og benda ferðamönnum á að keyra niður Grímsnes frá Þingvöllum og síðan þaðan upp Biskupstungnabraut.

Ég hef farið þennan veg oft á sumri í mörg ár. Það er alltaf sama sagan. Fyrst á vorinn er hann þokkalegur eftir að búið er að hefla hann og ef til vill bera í hann á stöku stað. Síðsumars verður hann yfirleitt nánast ókeyrandi, sérstaklega í rigningartíð.  Ég held samt að hann hafi sjaldan verið jafn slæmur og núna, þvottabrettin ógurleg og sumstaðar hefur runnið mikið úr honum. 

Vonandi kemst vinna við nýjan Gjábakkaveg í gang aftur sem fyrst. Lítið hefur miðað í sumar vegna gjaldþrots verktakans og veit ég ekki hvernig staðan er í því máli núna.  Hér er mynd af núverandi leið og tillögum um ný vegastæði.  Það er leið 2 sem var ákveðið að fara en ég hefði reyndar viljað að menn hefðu farið leið 4 eða 5 og gert nýjan veg fyrir sunnan vatnið.  Um það bloggað ég fyrir nokkru síðan, sjá hér.

 

Vegurinn yfir Lyngdalsheiði eins og þvottabretti

Athugasemdir

[Björn Hróarsson (IP-tala skráð) 9.8.2009 kl. 16:26]

Ástandið á veginum milli Þingvallasveitar og Laugarvatns er ólíðandi og kemur illa við ferðaþjónustuna. Vegurinn má heita ófær. Held annars að Vegagerðin nefni veginn Laugarvatnsleið en eins og allir vita (nema þá Mogginn) þá liggur enginn vegur um eða við grágrýtisdyngjuna Lyngdalsheiði. Þá er líka ólíðandi að framkvæmdir við nýja veginn þarna á milli skuli liggja niðri ... einhver hringavitleysa ... fyrst tók ríkið tækin af verktakanum ... og þar með gat hann ekki unnið verkið ... og þá hætti ríkið að borga honum. Þessi nýi vegur verður að komast í gagnið hið allra fyrsta en vefstæði 3 heillaði mig hvað mest en vefstæðinu verður verður ekki breytt úr þessu enda framkvæmdin langt komin.

[Marinó G. Njálsson, 9.8.2009 kl. 19:52]

Ég fer þessa leið nokkrum sinnum í viku með ferðamenn og ástand vegarins á föstudaginn var það versta sem ég hef séð.  Þvottabrettin voru um daginn, en í þetta sinn var hola við holu.

Varðandi vegstæðið, þá er leið 1 lang best fyrir ferðaþjónustuna, en aðrir vilja líklegast fá veginn sunnar.  Núverandi leið niður Þingvallahraunið er gríðarlega flott.  Þarna takast á ferðaþjónustan sem vill kokmast til Þingvalla á sem stystum tíma og hinir sem vilja komast til Reykjavíkur á sem stystum tíma.

[Tobbi (IP-tala skráð) 9.8.2009 kl. 21:11]

„fyrst tók ríkið tækin af verktakanum“

Þetta er ekki rétt.  Fjármögnunarleigan sem tækin átti tók þau af verktakanum, væntanlega í kjölfar vanskila.

[Þorsteinn Sverrisson, 12.8.2009 kl. 19:20]

Já leið 3 hefði líklega verið best.  Þá hefðu íbúar getað stytt sér leið austur með því að fara Nesjavallaveginn og suður fyrir vatnið en ferðamenn samt sem áður norður fyrir þó þeir hefðu þurft að keyra aðeins lengra suður með vatninu.