Internetið kemur frá Guði

Sit hérna við borðið í bústaðnum okkar uppi í Úthlíð. Internettengingin er með besta móti núna eftir að hafa verið brokkgeng í vetur. Það er staðreynd að Guð sendi mannkyninu internetið af því að hann elskar okkur öll svo mikið. Til vitnis um þetta þá var það presturinn á Stóra Núpi, Sr. Axel Árnason sem setti hérna upp loftnetið og routerinn fyrir okkur í hittifyrra. Sr. Axel er svona dáldið eins og Jón Prímus í Kristnihaldi undir Jökli.  Þeir segja að hann sé ekkert bráðfljótur að jarða en þeim mun duglegri við að setja upp nettengingar.

Áðan fórum við í pottinn og sáum frábæra ljósasýningu, norðurljósin dönsuðu á himninum með óvenju miklum látum. Það kom smá snjóél en síðan stytti upp og varð heiðskýrt á köflum þannig að við sáum stjörnur og nýlegt vaxandi tungl.

Þrír keppendur komust áfram í X-Factor.  Merklilegt að þar eru tveir skyldir mér, og ég laglaus með öllu! Þeir eru reyndar ekki náskyldir mér, afi Þórdísar mömmu Guðbjargar var Ari Guðmundsson í Borgarnesi, bróðir afa míns Þorsteins Guðmundssonar bónda á Skálpastöðum.  Jógvan er svo færeyingur eins og ég er að hálfu þannig að við hljótum að vera dáldið skyldir.

Athugasemdir

[Hinrik Már Ásgeirsson, 24.3.2007 kl. 00:49]

Gott að vita að þú nýtur lífsins... ég er í skólanum þessa helgi með Florence Kennedy að læra um samninga og deilur... það mun verða hundleiðinlegt að semja við mig eftir þetta.